Alexander stansa pantebanden
Då store mengder samanklemte plastflasker kom inn gjennom pantemaskinen, skjønte Alexander Haukås at noko var feil.
AV: eystein røssum
Ved panteautomaten stod ein 45-åring frå Moldova og mata inn tomgods. Plastflaskene i søppelsekken han hadde med seg hadde eitt fellestrekk: Dei bar alle preg av å ha vore klemt flate.
- Eg hadde vore borti dette før. Alle flaskene var bulkete og med knust botn. Eg tok frå han sekken og pantelappen, seier Alexander Haukås (32), assisterande butikksjef ved Rema 1000 Fjøsanger i Bergen.
Pantar to gonger
Mjuke plastplasker, såkalla PET-flasker, blir trykt saman i automaten etter at dei er panta. Deretter blir dei samla saman i store sekkar, som blir sendt som returgods.
Les også
Ga frå seg pengane
45-åringen frå Moldova hadde med seg ei kvinne som også hadde panta flasker sist måndag. Haukås og ein kollega følgde etter dei to etter at dei hadde forlatt butikken. I varebilen dei køyrde, låg det store mengder med bulkete og knuste flasker.
- Dei hadde 10-12 fulle søppelsekkar bak i lasterommet. Vi sa til dei at dette var ulovleg, seier Haukås. Paret gjekk med på å gje frå seg pengane dei alt hadde fått frå pantinga, og også nokre pantelappar som ennå ikkje var innløyst.
Tatt også i fjor haust
Haukås og kollegaen ringde også politiet, som kom og tok med seg begge storpantarane.
- Hos oss hadde dei berre køyrd igjennom for ca. 600 kroner. Dersom dei hadde fått panta alt, ville dei fått ut fleire tusen kroner, seier Haukås.
Dei to moldovarane var gamle kjente for politiet: I fjor haust vart dei begge varetektsfengsla222, mistenkt for å ha klistra falske pante-etikettar på tomgods.
Denne gongen var ikkje falske lappar inne biletet, og ifølgje politiet er saka denne gongen gjort opp med eit førelegg.
- Min klient har forklart at dei fann ein forlatt sekk med tomgods. Ho erkjenner at somme av flaskene måtte rettast ut, men var ikkje klar over dette var ulovleg. Ho trudde sekken var eigarlaus, seier advokat Jostein Alvheim, som forsvarer den 45 år gamle kvinna.